Por mor dun scriptiño Python que requería unha dependencia que requería… acabei decatándome de que tiña o servidor aínda en Ubuntu 20.04 (Groovy Gorilla), fóra de soporte.
Tan fóra de soporte estaba que nom che vos había ruta direita para actualizar á última versión de soporte a longo prazo, Ubuntu 22.10 (Jammy Jellyfish). De feito a primeira tentativa que fixen, hai uns días, tiroume o servidor abaixo sen poder entrar e tiven que restaurar un respaldo. Xa hoxe con máis tempo argallei outro modo de actualizar, que deixo aquí por se a alguén lle for útil.
En primeiro lugar tiven que modificar as rutas en /etc/apt/sources.list
a estas:
deb http://old-releases.ubuntu.com/ubuntu/ groovy main universe restricted multiverse
deb http://old-releases.ubuntu.com/ubuntu/ groovy-security main universe restricted multiverse
deb http://old-releases.ubuntu.com/ubuntu/ groovy-updates main universe restricted multiverse
deb http://old-releases.ubuntu.com/ubuntu/ groovy-backports main restricted universe multiverse
Que indican os paquetes nos repositorios para releases vellas. Unha vez feito e corrido sudo apt update
e sudo apt upgrade
e sudo apt dist-upgrade
podemos pasar ao seguinte paso.
Normalmente correríase sudo do-release-upgrade
pero iso tenta chegar á última dispoñíbel e imaxino que foi iso o que ma tirou abaixo. En troques, decidín virme exactamente á última LTS, que era abondo. Fun a este listado oficial e localicei a 22.04 (jammy
) e a súa liña da UpgradeTool
:
UpgradeTool: http://archive.ubuntu.com/ubuntu/dists/jammy-updates/main/dist-upgrader-all/current/jammy.tar.gz
Bastou logo seguir os pasos aquí indicados para baixala e executala:
# Downloads the upgrader
wget http://archive.ubuntu.com/ubuntu/dists/jammy-updates/main/dist-upgrader-all/current/jammy.tar.gz
# Extract it into a new directory
mkdir upgrader
tar -xaf jammy.tar.gz -C upgrader
cd upgrader
# Run the executable
./jammy
Durante o proceso deume algún erro con Apache (que non sei porque o tiña, se eu uso Nginx, así que o arranxei desinstalándoo) e con algo chamado usrmerge
. Este queixábase de que tiña uns binarios duplicados ciscados por aí. Borrei os que non estaban en cartafoles de alternative
e acabou por ir.
Aí xa comprobei, con risco e nervos, que podía reiniciar o servidor e non quedaba fóra como a outra vez. Primeiro fito acadado.
Mais falláronme o Python e o Pip cuns erros estranos de actualización mal feita, e tiven que purgar e borrar as instalacións un par de veces por todas partes até que as din reinstalado e funcionaron.
Logo, reaxustar Nginx para funcionar con PHP 8.1, que antes tiña o 7.4 e reconfigurar axeitadamente o novo php.ini
, activando mysqli
e subindo os límites de cargas e timeouts. E aproveitei xa que estaba para actualizar phpMyAdmin. E para actualizar FoundryVTT.
Rexurdiron logo máis problemas con paquetes Python que arranxei reinstalando primeiro con sudo -H pip install -U --ignore-installed XXX
, logo quitando con sudo -H pip uninstall XXX
e finalmente instalando como paquetes de apt
(por exemplo python3-netifaces
e python3-yaml
). Outro éxito.
Ah, porque si, desde o comezo estaba sen DNS. Fun tirando metendo a pincho nameserver 8.8.8.8
en /etc/resolv.conf
, pero o problema era que Ubuntu polo camiño deixou de usar a config en /etc/network/interfaces.d
para basearse en systemd-resolved
, que a ten en /etc/netplan
, e por iso non me collia os DNS axeitados.
Probei con cousas tipo engadir a /etc/netplan/00-installer-config.yaml
o seguinte:
network:
ethernets:
ens3:
dhcp4: true
version: 2
Pero seguía sen ir, e finalmente a solución foi instalar resolvconf
con apt
e logo correr sudo dpkg-reconfigure resolvconf
. Iso pareceu xerar o /etc/resolv.conf
cos valores correctos. Ou talvez foi correr sudo netplan apply
? Xa nin sei.
Buf! Por esta noite, ata aquí. Un ano de estos debería borrar todo e comezar con un Ubuntu fresquiño de cero, pero xa chegará. Polo de agora todo parece ir como antes: penso que xa é momento de facer un novo respaldo.
Podes interaxir con esta entrada de moitas formas: con pingbacks, con webmentions… ou simplemente respondendo a través do Fediverso, por exemplo visitándoa en Mastodon.